مرسى .. إذاوعد أخلف

من ايات المنافق الثلاث انه اذا وعد أخلف .. فى ناس بقة هوايتها انها تخلف وعودها !! يعنى تقريبا بيوعدوا مخصوص عشان يخلفوا وعودهم !! وطبعا لو حبينا ندى مثال عن الاشخاص دى مش هنلاقى احسن من ريسنا .. مرسى من الاشخاص اللى فعلا تكاد تكون بتوعد عشان تخلف !

فمثلاً  ..
مرسى وعد برفع المعاناة عن الملايين من المصريين وطبعا زى ما انتوا شايفين .. مرسى رفع المعاناة ورفع معاها الملايين اللى كان بيتكلم عنهم .. فالفقرا زى ما هما لسة بيصرخوا من نقص الموارد

مرسى وعد انه مش هيفرق بين مؤيديه ومعارضيه وفى اول حدث ضده فى محمد محمود وصف المتظاهرين بالبلطجية غير اللى عملوه جماعته فى المعتصمين قدام الاتحادية غير غير غير ..

مرسى وعد بطلب النصيحة من الشعب وماستجبش لطلبات المعارضين .. ده حتى ماسمعش لمستشاريه !! وفاكرين طبعا الاعلان الدستورى !

مرسى وعد انه مش هيستخدم التشريع الا فى اضيق الامور زى التامين الصحى !! استخدمه فى تحصين قراراته وعشان يخلى سلطته اعلى من اى سلطة !

مرسى وعد انه هيعيد تشكيل التاسيسية المطعون على شريعيتها وتحقيق التوافق الوطنى .. ماقربش منها بل بالعكس لما حس انها ممكن تتحل حصنها ومدها شهرين !!

مرسى وعد ان الدستور مش هيعدى غير بعد توافق الجميع عليه .. تقوم اللجنة تسلقه فى 48 ساعة فى غياب كل القوى المدنية ويدعو مرسى الشعب للستفساء عليه بعد 15 يوم !!

مرسى وعد انه لن يقص قلم .. قام لم كل الاقلام اللى فى البلد !!

مرسى وعد انه هيحترم القضاء .. مش هتكلم !!

مرسى وعد ان المعارضين هيكونوا شركاء ليه فى الحكم  وانه هيتناقش مع رؤساء الاحزاب وغيرهم .. وانفرد بقراراته وبدأ هو ومؤسسته الرئاسية فى تخوين المعارضين

بس برده كفاية انه رئيس "مؤمن" و "ملتحى" و "بيصلى"

لن يقصف قلم !

نادى مرسى وبكل قوة "فى عهدى لن يقصف قلم ولن تغلق قناة" فهلل خرفانه ومؤيديه نحن وراءك يا مرشد قصدى يا مرسى ومعاً من أجل الديمقراطية وحرية التعبير .. ولكن الان من واجبنا ان نقول له "يا لك من مغفل .. عشان ماتعلمتش من مبارك يا خروف" !!

ففى زمن قياسى قامت الرئاسة بإرشادها بجماعتها ببابا غنوجها بحملة "فشخ" أقلام غير مسبوقة بداية بقنوات دريم ومرورا بمنع ثروت الخرباوى من نشر مقاله فى الأهرام وبعدها حجب مقال عبلة الروينى من الأخبار ده غير اللى حصل لمحمد سعد و دكتورة منال عمر بعد حلقتهم فى اخر النهار واللى حصل للصحفية علا الشافعى وخالد صالح بعد مقال علا الشافعى فى اليوم السابع وده غير برده قفل قناة الفراعين ومصادرة جريدة الوطن ومقاضاة توفيق عكاشة وعادل حمودة واسلام عفيفى وعزل جمال عبد الرحيم من رئاسة تحرير الجمهورية وغير وغير وغير ...

وطبعا ده مش كفاية .. فعندك مثلا المادة 178 من قانون العقوبات بتقولك "يعاقب بالحبس كل من صنع او حاز بقصد الاتجار او التوزيع او الايجار او اللصق او لعرض صوراً من شأنها الاساءة الى سمعة البلاد سواء كان ذلك بمخالفة الحقيقة او اعطاء وصف غير صحيح او ابراز مظاهر غير لائقة او بأي طريقة أخرى" ... يعنى م الاخر قصدهم ان 99.9% من المدونين واعضاء فيس.بوك وتويتر هيتحبسوا .. وطبعا ده غير تهمة محاولة قلب نظام الحكم اللى ممكن عقوبتها توصل لاعدام وغيره وغيره وغيره كمان مرة !..

طب الخلاصة بقة عشان ما نرغيش كتير .. بوعودك أو من غير وعودك , بقوانينك وموادك وعقوباتك , م الاخر غصب عنك وعن ارشادك وجماعتك وخرفان وفى عهدك أو عهد غيرك ..

لن يقصف قلم !

120 دقيقة مرسى !

لقد عاشت الأمة المصرية فى يوم السادس من أكتوبر عام 2012 "120 دقيقة" من "أوسخ" لحظات حياتها .. تلك التى تابع فيها الشعب المصرى 120 دقيقة متواصلة من "الفسا" و"الخراء" فى كلمة لرئيس المجلس المحلى لجمهورية مصر العربية .. ففى ذكرى الحرب المجيدة البسيلة الفشيخة حرب 6 أكتوبر تحدث مرسى الى الشعب المصرى فى شتى مجالات فشله "وعلى فكرة مرهمهم كالعادة" ومن الأشياء العالقة بذهنى من يومها انى ماسمعتش حاجة عن الحرب فى ذكرى الحرب !!

فمثلاً تحدث مرسى عن الأمن ففشخنى بقوله "ما تحقق في المائة يوم وبمعايير مهنية كان بنسبة 70% تقريبًا في ملف الأمن مشيرًا إلى تنفيذ 27 ألف حكم في إزالة التعدي على أراضيب الدولة ونهر النيل وضبط حوالي 500 تشكيل عصابي و 6000 قضية واسترداد 6600 سيارة مسروقة الحملة الكبيرة على بحيرة المنزلة وضبط 1542 متهم فيها منهم 330 شديد الخطورة وتم إزالة التعديات من على 8200 فدان" ... قوم ايه بقة !!! يزيد الفشخة فشخة بقوله "هذه بعض الأرقام إضافة إلى مساهمات كبيرة منها ما يحدث في سيناء لتأمين أهل سيناء وتأمين حدود الوطن والتي يقودها رجال القوات المسلحة الأوفياء ووزارة الداخلية والمخابرات العامة وجهات الأمن المختلفة بالتعاون مع أهل سيناء المخلصين لأهلهم ووطنهم ومستمرين حتى تحقيق كامل الأمن على كافة أرجاء الوطن" ... لع لغاية كه ومش جادر .. كفاية امن كدة عشان لو كملت ممكن أقبّح !.

طب نعدى الأمن .. مرسى تحدث فاشخاً عن الوقود .. قال ايه بقة ؟!!.. قاللك يا اخويا قال ايه ان فى عصابتين من وزارة البترول بتستولى على 23 مليون لتر! وتخسر الدولة بسببهم 660 مليون جنيه .. وايه بقة !!!! .. الوقود مدعوم بـ 100 مليار جنيه وهناك من يشتري لتر السولار بجنيه ويبيعه بـ 16 جنيه ... حد يطلعلى حاجة مفيدة من الهرى ده بقة :\

ثم جاءت الفشخة الكبرى لما قاللك ان أزمة البوتاجاز بنسبة "85%" .. بجد بجد بجد أنا امبهرت !! على فكرة مش قادر أمسك لسانى اكتر من كدة !!

أما عن ملف النظافة فقد صرح سيادته قائلاً وبكل ثقة تم ازالة 660 طن زبالة وتم تحقبق 40% من وعوده .. وده بقة اللى بيحللوه علماء "الفسايولوجى" بان الشخص المزنوق بيسلك طريق "الفسا" وهو ضرب اى ارقام فى اى حتة وربك هيسترها !!

أما بجة عن المرور فصرح قائلاً "تم تحرير أكثر من مليون و500 ألف مخالفة مرورية خلال شهرين، كما تم حل 60% من مشكلة المرور وتحرير 43 ألف مخالفة مرورية عكس الاتجاه، و6 آلاف مخالفة للسير بدون رخصة والاحتجاجات الفئوية وقطع الطرق لا تعنى إعاقة الانتاج" .. اه صحيح واستنكر إضراب سواقين الميكروباص .. انا مش هتكلم واظن الرسالة وصلت!.

ده غير بقة رصد 16 مليار جنيه عشان العيش وتحقيق 80% من وعوده المتعلقة بالخبز وكدزة يعنى !.. وغير طبعاً اصراره والحاحه على معرفة قتلة الثوار "اللى هو واحد منهم" ده الراجل عاملكوا لجنة تخصّى حقائق يا جدعان انتو ايه !!!! ..

اااااااه بقة لما قاللك على ملف الأقباط اللى بيتهجروا من سينا .. دوناً عن كل الفسا فى جملة عجبتنى فشخ الا وهى "البعض يحاول تشويه الصورة وايجاد ثقب فى الثوب الأبيض" .. لا الجملة كيفتنى فى الحقيقة.

أنا مش زعلان من الخطاب ولا زعلان على الـ120 دقيقة اللى ضاعوا من عمرى هدر .. أنا زعلان بس على الكام مليون مواطن اللى كالعادة اتمرهموا من الخطاب وفى تلك اللحظة يحضرنى قول الله يرحمه نجيب سرور لما قال:-

 يا شعب يا معـ** يا غاوى تتبعـ** تاخد خازوق وخازوق ... راح امتى بس تفوق ؟!!

عن الازدراء ورد الفعل "الأوفر"

قاطعوا المنتجات الدينماركية .. اطردوا السفير الامريكى .. اغلقوا السفارة الهولندية .. مش عارف ايه للسفارة الفشخنجية .. بلا بلا بلا .. كل يوم افتح الاقى واحد مشير صورة دولة كذة الكافرة الفاجرة الزنديقة عملوا فيلم (على اساس ان الدولة كلها عملت الفيلم) قال ايه يا اخويا مسئ للاسلام وللرسول وبيدعوا الناس انهم يقاطعوا منتجاتها ويهاجموا سفارتها ويعملوا ويعملوا ويعملوا .. أنا رأيى بيختلف كتير مع ده ويمكن رأيى مايعجبكش كتير منكم بس ادينا بنتناقش ..



أولاً ..
لا امريكا كلها اللى عملت الفيلم ولا هولندا كلها اللى عملت الفيلم ولا الدينمارك كلها اللى عملت الفيلم ... ولا أقباط المهجر كلهم اللى عملوا الفيلم !! .. الفيلم ده واحد او مجموعة اللى عملوه .. فوجه انتقادك للواحد او المجموعة دى مش لدولة :\ ... اه ويا ريت يكون انتقادك منطقى !


ثانياً ..
الراجل المخرج الكافر السافل الفاجر الزنديق ابن اللذينة ده عمل فيلم .. اللى حصل انه قال رأيه بشكل ماعجبكش وأساء لدينك أو لرسولك أو لثقافتك .. جميل !! ماتتفرجش على الفيلم ولا تنشره .. فالراجل نزل فيلم اللى عايز يدخله بيدفع تمن تذكرة وبيخش يتفرج واللى مش عايز اهلا وسهلا مايدخلش !! .. فمثلاُ الحكومة الفرنسية سمحت بعرض مسرحى بيتكلم فيه مخرج العرض عن تفاصيل وجه "المسيح" الناس قالت انه كان مسئ للمسيح وده كان حقيقى .. الحكومة الفرنسية اعتقلت كل اللى حاولوا يمنعوا العرض ووزير الثقافة الفرنسى "المسيحى" خرج وقال للناس ان دى حرية تعبير وانتقد الناس اللى حاولت تقتحم المسرح !!


ثالثاً ..
الأفلام دى لو هنصنفها تصنيف فهتندرج تحت حرية الرأى والتعبير .. صاحب الفيلم عنده فكرة وعبر عنها وعرضها على الناس .. انت كمان من حقك انك تنتقد الفيلم ده ... لكن مش من حقك انك تمنع عرض الفيلم ده ولا من حق  البلد اللى انت رايح تتظاهر قدام سفارتها انها تمنع عرض الفيلم لان ده ببساطة هيكون انتهاك صريح لحرية الرأى والتعبير اللى احنا مفتقدنها فى بلدنا العزيز ..

الخلاصة .. لازم نتعلم ان الفكر بيواجه بالفكر .. مش بمقاطعة منتجات ولا اقتحام سفارة او طرد سفير .. لازم ثقافة الاختلاف !!

مجتمع شرقى

الحاجة الوالدة وجيلها بالكامل بالاضافة الى البعض من الاجيال الحديثة دايما بسمع منهم كلمة شليلة اوى فعلا "يعنى تشل" .. الا وهى (احنا مجتمع شرقى مش غربى وثقافتنا مش بتسمحلنا بكذة .. ولازم نحافظ على ثقافتنا) !!.

طب اقولك !.. طل طلة كدة على ثقافة المجتمع الشرقى اللى احنا متمسكين بيها اوى دى وماينفعش نستغنى عنها .. هتلاقيها صفار بيض .. فبعد تفحيص وتمحيص وتفعيص اكتشفت لقيت ان الثقافة اللى بنتكلم فيها دى بتنحصر فى كام حاجة فقيعة غير واقعية ولا منطقية .. لكن طبعا ماينفعش نخالفها !!..

فمثلا ً ..
مجتمع شرقى يعنى الولد مسموحله كل حاجة والبنت ممنوع تعمل اى حاجة .. مجتمع شرقى يعنى الهوت شورت فى الساحل عادى لكن برا الساحل قلة ادب !! .. مجتمع شرقى يعنى البنت لو خلصت جامعة وماتجوزتش بعد حفلة التخرج يبقى وش مش هتتجوز !! .. مجتمع شرقى يعنى البنت اللى بتشتم تبقى سافلة انما الولد يشتم ده طبيعى .. مجتمع شرقى يعنى الحشيش عيب انما الخمرة حرام !! .. مجتمع شرقى يعنى ماتضحكيش بصوت عالى فى الشارع لان دى مياعة وقلة ادب !! .. مجتمع شرقى يعنى لو بنت واقفة مع ولد فى الشارع فمتوقع طبعا انها تروح معاه شقة مفروشة !! .. مجتمع شرقى يعنى الولد يحب براحته لكن ساعة الجواز لازم ماما تختارله واحدة متربية وبنت اصول تختارها هى .. مجتمع شرقى يعنى بنت بتشرب سجاير وشيشة يبقى اكيد اهلها ماربوهاش ومايعرفوش عنها حاجة ! .. مجتمع شرقى يعنى اتطلقتى ؟!! اكيد العيب منك ومحدش هيرضى يتجوزك تانى ! .. مجتمع شرقى يعنى لو عملت حاجة غلط فالعيب مش عليك العيب ع الهانم اللى ماربتش !! .. مجتمع شرقى يعنى الولد يحب واحدة ويتجوز واحدة غيرها خااالص !! .. مجتمع شرقى يعنى يخافوا ع البنت من الدنيا ومايخافوش على الولد من الاخرة .. مجتمع شرقى يعنى البنت عيب تجرى او تركب عجلة .. مجتمع شرقى يعنى البنت فى الجواز ليها صلاحبة "ثلاثون عاما" .. مجتمع شرقى يعنى كل الامراض النفسى والعصبية !!

الخلاصة .. مفيش حاجة اسمها شرقى ولا غربى ولا فشخنجى .. انت بثقافتك مش بثقافة جدك ! ..  انت باللى مقتنع بيه مش باللى الناس مقتنعة بيه .. انت انت !

التحرش بالمدونات !!

فيه ناس كتير بتنتقدنى عن كلامى عن الدين .. عن كلامى عن التجنيد .. عم حاجات كتير .. بس غريبة اوى اوى اوى ان اكتر من واحد ينتقدنى فى مدوناتى اللى بانتقد فيها التحرش الجنسى !! .. انا فعلا لسة مش مستوعب ده.

لما دورت شوية لقيت ان مش اول مرة الحوار ده يحصل .. فمن فترة بعض المدونات اختاروا انهم يفضفضوا شوية ويتكلموا عن اللى بيشوفوه البنات فى الشارع بطرق مختلفة .. بلغة عربية عامية قبيحة فجة ساخرة !! ايا كانت الطريقة .. المفاجأة ! هجوم بطريقة غريبة عن المدونات اللى اتكلموا عن الموضوع ده .. غريبة فعلا !!

تمام .. المدونات ماسكتوش اكيد .. عملوا حملة جميلة جدا اسمها "كلنا ليلى" شاركت فيها المرأة بكل طوائفها .. محجبة او بشعرها .. مسلمة او ميسحية ,, مسيسة او لأ .. الكل كتب وطلع اللى جواه بكل جرأة .. وفهموا الناس بجد يعنى يبقى فيه "مرأة" فى مصر.

وطبعا ذروة الحملة دى لو تفتكروا لما المدونين كشفوا احداث التحرش الجنسى فى وسط البلد فى الاعياد .. واللى كان بيطلع يكدب ولا يهاجم كانوا بيحطوا صباعهم فى لامؤاخذة عينه الن كل حاجة كانت واضحة وبالفيديوهات.

طبعا لا ينسى للمدونين فى الوقت ده انهم مش مركزين على السلبيات بس فكانوا بيتكلموا برده عن اصحاب المحلات والشباب النضيفة اللى كانت بتدافع عن البنات فى الوقت اللى كان الاعلام مركز على السلبيات بس (ويقولك احنا اللى بنشوه صورة مصر)

على التوازى اهتم المدونين بنوع تانى من التحرش هو التحرش السياسى .. كانت البداية من التحرش بالمتظاهرات ايام الاستفتاء .. وبعدها كانت شهادة محمد الشرقاوى عن خطفه وتعذيبه فى قسم قصر النيل بعد يوم واحد من تعذيبه .. كان تقريبا الشرقاوى اول واحد بتكلم بشجاعة وبدون خوف عن التعذيب داخل الاقسام وطبعا ده فتح الباب قدام ناس كتير انها تتكلم زى عماد الكبير وغيره !

الخلاصة ... محدش يقدر ينكر دور المدونين فى مواجهة مشكلة التحرش الجنسى .. احنا طبعا لا حلينا ولا هنحل المشكلة بالكتابة بس .. لكن ع الاقل قضينا على اى محاولة لانكارها او هدمها !.

ردا على مدونة شاب !..

كنت من فترة كتبت مدونتى (لكم دينكم ولي الاختيار) .. وكنت بعرض فيها رأيى عن حرية الفرد فى اختيار دينه بعد وصول سن النضج او الرشد .. وطبعا انتقدت كتير واتشتمت كتير بس فى (شاب) كتب مدونة موجهة ليا ردا على مدونتى وعلى اى حد عجبته الفكرة او المدونة "اللى وصفهم بالجهلة والحمقى"

فى البداية يا شاب من حقك انك تنتقدنى او تقومنى زى ما سميتها انت .. لكن مش من حقك "ومش هسكت على ده" انك تقول على اللى عجبته المدونة والفكرة واللى قاللى "برافو" و"واو الله ينور عليك كلامك مظبوط" انه جاهل او احمق .. لان ده تعدى على اداب المناقشة والحديث وكان من المفترض انى ماردش عليك بس معلش !!!..

اولا .. انا قولت تعبير "الاذان فى الودن واصطحاب الاطفال للجوامع" استعارة عن فرض الاباء على ابناءهم اداء الطقوس الدينية وزرع مبادئ الدين عند الطفل دون ترك الفرصة للنظر الى الاديان الاخرى .. وكان واضح انى ماقصدتش التدخل فى طقوس دين معين "الاسلام" .. والدليل انى قولت بالنص (ونفس الكلام مع المسيحيين باختلاف الطقوس الدينية) .. وممكن الرجوع للمدونة والتأكد .. وارجو انك ماتخترش الكلام اللى يكيفك وتسيب الباقى.

هترك نقطة حكم الاذان وما شابه لاصحابه لانى ماتكلمتش ولا هتكلم فيه .. لانى مش بتدهل فى مدوناتى او انتقد دين معين بطقوسه لان الدين مش اسلام بس يا شاب وممكن ترجع لمدونتى (أديان) وتعرف ايه مفهوم الدين !..

الكثير ومنهم (الشاب) انتقد انتقادى لفكرة انه يتكتب فى شهادة ميلادى مسلم او مسيحى او بوذى او اى ديانة بمجرد ميلادى وقبل ما اكون اى فكرة عن الاديان.

كما قال (الشاب) الطفل ليس حر ولا يعرف شئ عن الدين .. لكن الطفل المفروض انه يتركه والده الى ان يصل لسن الرشد وهنا يأخذ قراره فى اختيار الدين .. فى المدة دى بقة الوالدين ينصحوا اولادهم ويعرفوهم يعنى ايه دين ..لكن مايفرضوش عليه دين واحد .. لانك لما تتربى على حاجة 18  19 سنة اكيد مش هتفكر فى حاجة غيرها .

وأخيرا .. انا انتقدت حالة مجتمعية تحدث فى مصر فعلا ولكن مش فى مصر بس ! .. والاحساس بصفار البيض اللى اتكلمت عنه هو الاحساس الذى انتابنى بمجرد قراية اول سطر من مدونة (شاب) ويا زميلى .. خانك عدم فهم التعبير :)..

أديان !

كونى "أحمد" جعل نقاش الناس معايا فى الدين قاصر على الاسلام فقط وحاولت كتير اوضح للناس انى باتكلم عن الدين عامة مش الاسلام بس .. فقررت انى احكى معاكوا شوية عن الدين كمفهوم ..

* فى البداية .. يعنى ايه دين ؟!! ..

- الدين جاية من "دان"  .. يعنى خضع او ذل .. والتدين هو الخضوع والذل "للرب طبعا !" .. 

- علماء الاجتماع والانثربولوجى عرفوا الدين على اساس انه أفكار المجردة أو قيم أو تجارب جاية من الثقافة

- أساتذة العلوم الانسانية كانت ليهم وجهة نظر برده .. فمثلا جريج إبستين استاذ العلوم الإنسانية قال: "في الأساس كل الديانات الكبرى في العالم تأسست على مبدأ أن هناك قوة سماوية مع ذات مستوى من العدالة في عالم خارق ولا يمكن أن يأتي من الطبيعة"

- وغيره ..

* اذا فالمعتقد الدينى غالبا بيرتبط بالطبيعة والوجود .. بعبادة اله أو آلهة واشراك الإلهية في الكون والحياة البشرية .. وبيرتبط برده بالقيم والممارسات .. وفي بعض الديانات "زى السماوية او الابراهيمية" يقال أن معظم المعتقدات الأساسية كشفت من خلال اله.

* ولكل دين أسس وثوابت موجدة في كل دين .. زى الإسم - المؤسس - الكتاب - التقويم - اللغة - مكان العبادة - الطقوس - وقت الظهور.

* اكبر ديانات فى العالم هم المسيحية "2.2 مليار نسمة" .. الاسلام "1.6 مليار نسمة" .. والبوذية ثم الهندوسية ثم اليهودية

* بعض العلماء صنفوا الاديان لنوعين :-

1. الأديان العالمية التي حققت قبول في جميع أنحاء العالم وذات تزايد كبير من المعتنقين الجدد لهذه الاديان.
2. الديانات العرقية التي يتم تحديدها ضمن مجموعة عرقية معينة ولا يوجد إقبال على اعتناقها.

* كتير من العلماء وممارسى الدين والحقوقيين اكدوا على ضرورة التعاون بين الاديان او زى ما بيسموه حوار الاديان .. اول حوار اديان كان باسم (برلمان اديان العالم) فى المعرض الكولومبى العالمى سنة 1893 .. وكانت اخر المبادرات "كلمة سواء" و "الارض المشتركة" .. الاول بين الاسلام والمسيحية .. والتانى بين الاسلام والبوذية .

فافتكروا ان الدين اكبر بكتير من المفهوم اللى فى دماغك .. الدين مش بس اسلام او مسيحية .. 

الصراحة راحت !..

فى حاجات كتير ويمكن فى كل اللى كتبته قبل كدة كان دايما رد الفعل بيكون بالتكفير والتخوين والشتيمة وساعات التهديد .. وكان اللى بيشكر فيا كان بيقولى انت جرئ !!


طبعا دى شهادة اعتز بيها جدا واكيد الجرأة شرف وثمة صعب انك تلاقيها فى اى حد .. لكن اللى نفسى اوصله لناس كتير ان انا صريح مش جرئ !! .. انا اللى بتكلم فيه سواء رأيى فى دين أو فى التجنيد أو فى المرأة أو أيا كان اللى بحكى فيه هى موضوعات واراء من المفترض ان ليا ولأى حد الحق انه يتكلم فيها وبكل حرية .. 


لكن للاسف تقاليدنا وعادتنا وثقافتنا اللى للاسف زرعتهولنا اجيال قديمة عشان احنا اللى نلم محاصيله الفاسدة حولت الصراحة الى جرأة .. والعادات دى برده اللى خلت الواحد يخاف يفكر فى الدين .. خلت الولد بيبص للبنت بصورة مش موجودة غير عندنا .. خلت الجنرالات تستعبد الشباب لان ثقافتهم منعتهم من التفكير !!..


انا اللى نفسه اوصله ان انا وانت من حقنا نتكلم وبكل صراحة مش جرأة .. لان مفيش حاجة تخوفنا ولا ترعبنا من الكلام عشان نواجهها .. مفيش مخاطر بتقابلنا عشان نتغلب عليها .. مفيش حواجز فى طريقنا .. الموضوع اسهل من كدة بكتير .. الموضوع مش اكتر من فكرة بتدافع عنها .. 


فكر .. قرر .. اتكلم .. واجه .. اصدم .. ناقش .. وماتخفش من ردة فعل اى حد .. بجد ده حقك .. اه وربنا حقك 

أنا صريح :)..

تحيا جمهورية مصر الطائفية !..

"دفن الرؤوس فى الرمال" .. منهج فشيخ تتبعه مصر وبطريقة "جزمة" فى مواجهة حوادث الفتنة الطائفية .. بداية من الخنكة ومرورا بمئات الحوادث المشهورة والغير مشهورة وصولا ل قميص دهشور !!!..


واحدة واحدة .. من الطبيعى ان بناء الكنايس يكون من ملفات الدولة .. او من مهام الاحزاب مثلا ! .. لكن مع بداية الشد وبداية احداث الفتن وخصوصا الخانكة مش فاهم ليه اتحولت قضايا بناء الكنايس ومناقشة مشكلة الطائفية مطالب مرفوعة من الكنيسة !! وبناءً عليه تحولت مصر الى حزبين كبار .. حزب مسيحى برئاسة البطريرك ... وحزب مسلم برئاسة "رئيس الجمهورية"!.. فتتوالى الاحداث من خانكة للزاوية الحمرا للكشح لنجع حمادى لابو قرقاص وشوية حاجات كتير كدة فى النص لغاية ما نوصل للقميص !!.


طبعا ً عيب نتكلم كل ده وننسى الدور التاريخى للرئيس الراحل الله يجحمه مطرح ما راح "محمد أنور السادات" .. فكان التكفير من الجماعات الاسلامية للمسيحيين فى هصره برعاية رسمية .. وطبعا كان ليه الدور الاول والاساسى فى كنيسة الخانكة !! وبعدها الزاويا الحمرا !! لغاية ما يسافر بسلامته عشان يمضى معاهدة كامب ديفيد وفى موقف محدش يقدر ينساه للبابا شنودة .. يُعزل البابا !!.. ومن وقتها وزادت الفتنة فتوصل لاستحلال اموال المسيحيين ويبدأ السطو على محلات الذهب وعلى البيوت احيانا وتبدأ توصل لقتلى وجرحى كتير زى اللى حصل فى الكشح ! .. 


ومن ساعتها و احنا بنستغرب لما تعدى عليناا فترة من غير حادث فتنة !! .. وطبعا كل مرة بندفن روسنا فى الرمل بدل ما ندور ونحاول نوصل لحلول او حتى لاسباب الحوادث دى ..


وطبعا طبيعى جدا بعد اللى بيحصل ده ان احنا نلاقى قميص بيتسبب فى موت ناس واصابة ناس وتهجير ناس !!!..

فتحيا جمهورية مصر الطائفية !.

من حقها !.

من عجائب مجتمعنا العار انه يعامل مرأة على انها "ناقصة" معتقدا وفكرا وغيره .. ان المرأة بالنسباله هى فتنة .. المرأة بالنسباله ما هى الا طباخة او عاملة نظافة "اه وفى احيان كتير وسيلة للمتعة!" .. الى ان اصبحت "المرا" شتيمة !.




مجتمع بتشغله السبابا وما ملكت اليمين وتعدد الزوجات عن صعود القمر .. مجتمع  بالنسباله المرأة مخلوق ضعيف بيتحكم فيها الراجل .. يمين يمين شمال شمال .. مجتمع ذكورى.




عزيزى الدكر ..
عمرك ما هتنقص من حقوق المرأة .. البنت زيها زيك على فكرة .. لا ناقصة ايد ولا رجل ولا مخ .. بل بالعكس المرأة ليها مهام ماتقدرش انت تقوم بيها .. اختلفت عنك بفروق بيولوجية محددة لكن ملكش الحق انك تتريق عليها او تذلها بحاجة منها !! .. 




عزيزي الدكر ..
البنت من حقها تفكر .. من حقها تقرر .. من حقها تغلط .. من حقها تجادل .. من حقها تتكلم .. من حقها تختار .. من حقها تقرا .. من حقها تمثل .. من حقها تغنى .. من حقها ترسم .. من حقها تحلم ..

من حقها تعيش

لكم دينكم ولى الإختيار !..

تعالوا نفتح مخنا حبة ونوسع من دايرة تقبل الرأى حبتين بعيدا عن التعصب الدينى !!..


"كمسلمين" كل واحد بعد ما يتولد بـ3 دقايق الأب بيأذن ويقول الشهادتين فى ودنه .. 3 سنين كدة ويبدأ يروح مع باباه المسجد ويصلى معاه وهو مش عارف هو فين ولا اللى بيقلد باباه فيه ده ايه !! .. ونفس الكلام مع البنات .. ومع المسيحيين "مع اختلاف الطقوس الدينية" .. وطبعا مع الوقت الدين والأفكار اللى اتربى عليها الشخص من وهو عنده "3 دقايق" بتثبت اكتر واكتر.




أنا بقة ضد ده .. أنا ضد ان المولود يتكتب فى شهادة ميلاده بعد ما يتولد "بساعات" مسلم او مسيحى .. يعرف منين هو الاسلام او المسيحية ؟؟!! .. ليه افرض عليه دين اتفرض عليا ؟؟!! ..




أنا اللى بعمله حاجة بسيطة جدا واظن انها من ابسط حقوقى .. انا اللى بعمله انى بفكر .. ممكن بكرا تلاقينى مسلم .. ممكن تلاقينى يهودى .. ممكن تلاقينى ربانى .. ممكن تلاقينى ملحد .. ومن حقى برده انى اسأل .. ومن حقى انى انتقد.




أنا نفسى لما ابقى مسلم ابقى مسلم عشان سمعت وقريت فاقتنعت .. مش عشان ابويا أذن فى ودنى او عشان مكتوب فى بطاقتى مسلم !! .. نفسى الوالدين يسيبوا اولادهم لغاية ما يكبروا ويبقى ليهم هما الاختيار بناءً على اقتناعاتهم هما .. واظن ان مفيش حاجة غلط فى كدة !!..

ممكن أفكر ؟؟!!..

اللهم انى صائم

من عجائب شعبنا انه طول النهار كل ما يشوف بنت -ان شالله تكون منقبة- بيبص الناحية التانية ويقول "اللهم انى صائم" .. وتيجى بقة بعد الفطار وفى طول ايام السنة عموما تلاقى عينيه مفنجلة وقد كدة ! .. وفى الغالب ايديه بتسبق عينه.


والجميل برده فى شعبنا جملة "فلانة بوظت صيامى" .. اعذرك لو شفت واحدة مبينة دراعها و لابسة فستان او جيبة للركبة وماستحملتش .. بس مش معنى انك مش مستخمل انك تجيب العيب عليها او انك تدايقها بالكلام او او او ..


وبما انك مش مستحمل فعندك يا اخى ميت حاجة تعملها .. بص بعيد يا عم .. امشى من شارع تانى .. يأما بقة مادام اخترت انك تبصلها يبقى تكتم فى نفسك وتسكت.




عزيزى الدكر ..


أولا ً .. رب رمضان هو رب فبراير مش كدة ولا ايه !!! .. القناعات مش بتتبدل من شهر للتانى .. والمبادئ مش بتتغير من قبل الفطار لبعد الفطار.


ثانيا ً مش بعد ما تتفرج ع البنت اللى عاجباك واتماديت فى شهوتك دون أدنى تحكم فى غريزتك تجيب اللوم على البنت وتقول انها فطرتك.

عزيزى الدكر .. حاسب نفسك الأول :)..

سقطت عسكرة المدارس

أنا أحمد حسن .. كنت قلت قبل كدة "لا لعسكرة المدارس" ورفضت انى امتحن مادى التربية العسكرية وكنت بستند فى اعتراضى على أداء الامتحان الى:-




* أولا ً ان مدرستى "المنيا الثانوية بنين" مش "المنيا الثانوية العسكرية" .. فبأى حق يفرضوا عليا مادة التربية العسكرية !!.
* ثانيا ً انى وقتها (انا وغيرى كتير) ماكنتش تميت الـ18 سنة .. يعنى قاصر .. يعنى لا يجوز لأى حد انه يفرض عليا أداء اى صورة من صور الخدمة العسكرية.
* ثالثا ً انى برفض انى اكون اداة بتعدها المؤسسة العسكرية على مزاجها عشان تلغى نهائيا ً فكرة الاعتراض الضميرى أو الاعتراض على أداء الخدمة العسكرية من دماغ جيل بأكمله.




وبالفعل .. قبل امتحانى بأيام قليلة بدأت أفكر وأنا ايه اللى يخلينى أسكت على حاجة مش عايزها .. ايه اللى يخلينى اعمل حاجة بتخالف معتقداتى سواء الفكرية او السياسية .. أخدت قرار انى مش همتحن التربية العسكرية وبدأت على قد ما أقدر أنشر الفكرة بين ناس كتير ومنهم اللى وعدنى انه مش هيمتحن .. بس للأسف يوم الامتحان اكتشفت ان ده كان كلام وان الناس دى اقل ما يقال عليهم انهم عبيد !!.

يوم الامتحان حصلت حاجة تانى طريفة .. انا واقف قدام مكتب مسئول العسكرية فى المدرسة عشان أبلغه انى مش همتحن فاسمع عسكرى بيقول "الجيش والشعب ايد واحدة" فكرد فعل تلقائى وطبيعى قولتله "ايد عايزة القطع" .. وهنا بقة يسمعنى العقيد اللى كان موجود عشان الامتحان فيزيد العند اكتر.




-- الإجراءات اللى اتخذتها المدرسة ضدى :-
* حجب النتيجة عنى
* استدعائى لقضاء 15 يوم فى الصيف وأداء التمارين العسكرية بالمدرسة


--الإجراءات اللى عملتها أنا :-
* تقديم طلب باستثنائى من أداء المادة ومن قضاء الـ15 يوم المطلوبة منى
الى المستشار العسكرى بالمحافظة .. ولكنه تجاهل الأمر.

بالفعل .. اتحجبت عنى النتيجة من يوم الثلاثاء 17/7/2012 لغاية ما سحبتها يوم الأربعاء 25/7/2012 .. بناءً على طلب قدمته لمدير المدرسة.

لا لعسكرة المدارس .. لا للتجنيد الإجبارى

أنا ضد التحرش الجنسى

مؤدبة - مطيعة - صوتها واطى - بتمشى فى حالها - غلبانة وكل هدفها انها تعيش - ملهاش تجارب قبل الجواز - بتصلى وتصوم وتتعبد - متعلمة - بيضا وحلوة ومش مسلوعة ولا تخينة - شعرها طويل وسايح ونايح ..

مواصفات انا لو بنت كنت هفرح جد ً انى امتلكها لكن للاسف .. 

لو بتتوافر فيك المواصفات دى تخاف تمشى فى الشارع

البنت فى وجهة نظر كتير من (المش رجالة) المصريين هى درجة تانية وانها أضعف منه بكتير .. فمن الطبيعى انها تكون محل استهانة بحقوقها واهانة ليها من باب الرزالة مش اكتر .. واحيانا من باب القهر.

يعنى احيانا كتير (وده اللى بشوفه بعينى واحيانا كتير من اصحابى) بيكون التحرش الغرض منه التريقة مش اكتر .. واظهار عدم الاحترام للى بيتحرش بيه ,, وبتوصل لان الولد بيستبيح لنفسه فرض نفسه على اللى قدامه بالرزالة والتباتة والقذارة واللمس والضرب وغيره .. وطبعا على مسمع ومرأى الجميع !..

هو بعد مابياخد البنت اللى من الكتالوج دى شايف انها تحت امره ..ايه يعنى اما يبصبص لواحدة تانية...

التحرش بالنسبالى مش بس ان الشاب يتعرض لبنت على اساس ان ده اظهار اعجاب او سخافة .. لا هو زى لعب الطاولة كده تسليه .. التسليه دى بقى مش بس تسئ للبنت اللى انت اهنتها فقط لا ولمراتك وبنتك واختك وامك .. 

الست فى مصر اختارت انها تكون مطابقة للمواصفات اللى اتكلمت عنها فى أول كلامى .. لكن للاسف لما تلاقى رفيق العمر بيبقى قدامها حاجتين .. لاما تقعد فى البيت .. لاما تمارس حياتها وشغلها عادى بس تستحمل الكلام الى هتسمعه وهى مروّحة (دى لو رسيت على كلام) فتبدأ بأمين شرطة يقولها لفظ قذر وبعدها كلمتين حلوين تاخدهم وهى فى الميكروباص وغيره وغيره لغاية ما توصل لبيتها ويوم ما تشتكى يكون الرد ..

 "انت كنت لابسه ايه..اكيد انت اللى ماشيه تتقصعى..مانت لو ماشية محترمة ماكانش حد بصلك"

أنا ضد التحرش الجنسى

معترض ضميرى

أخش فى الموضوع على طول .. فى الأول أعرفك يعنى ايه اعتراض ضميرى او (conscientious objection).


الاعتراض الضميرى او (conscientious objection) بكل بساطة هو قانون دولى أقرتهولك مفوضية الأمم المتحدة لحقوق الانسان (United Nations Commission of Human Rights) زيه زى قوانين كتير خاصة بحقوق الانسان برده اقرتهالك مفوضية الامم المتحدة لحقوق الانسان .. زى الحرية الفردية وحرية الاختيار وحرية العقيدة والدين وغيرهم .. القانون ده بيديك الحق فى الاعتراض على أداء الخدمة العسكرية ..




إزاى ؟! ..


فى الدول اللى الاعتراض الضميرى فيها مشروع مقنن أى حد مش عايز يدخل الجيش بيقدم طلب لوزير الدفاع او لقائد الجيش بيقول انه رافض دخول الجيش وانه عايز يستخدم حقه فى الاعتراض الضميرى .. وهنا بيكون الوزير مجبر طبقا للقانون انه يلبى طلب الشاب ده.


فى دول بتعفى الشباب اللى استخدموا الاعتراض الضميرى عموماً وفى دول تانية بتحولهم لخدمة مدنية مش عسكرية .. يعنى يقضوا الفترة بتاعتهم فى اى هيئة حكومية تخدم المواطنين (جمعية اهلية - دار مسنين - مستشفى حكومى ..... ).




تمام .. أول وثيقة رسمية من مفوضية الامم المتحدة بتتكلم عن الاعتراض الضميرى مانت سنة 1995 وكانت بتقول "هؤلاء الذين يؤدون الخدمة العسكرية يجب ألا يتم استثناءهم من حق الاعتراض الضميرى" .. وبعدها بـ3 سنين يعنى سنة 1998 اصدرت المفوضية وثيقة كاملة بعنوان "الاعتراض الضميرى على لخدمة العسكرية" .. وبعد كدة صدرت مواثيق دولية كتير بتؤكد حقك فى الاعتراض الضميرى على الخدمة العسكرية.
والوثائق دى كسبت احترام المجتمع الدولى و بقت فى دول كتيرغير قابلة للنقاش أصلا .. يعنى مثلا: الاتحاد الأوربى من أهم شروط عضويته: أن الدولة المنضمة للاتحاد ضرورى تكون بتكفل الاعتراض الضميرى لمواطنيها .. يعنى فية دول فى الاتحاد الأوربى عندها لسة تجنيد إجبارى بس الدول دى عندها اعتراض ضميرى يعنى أى مواطن فيها مش عايز يدخل الجيش بكل بساطة مش بيدخل من غير ما دة يضره فى أى حاجة فى حياته المدنية او السياسية.


واللى ماتعرفوش بقة ان اكبر المشاكل اللى منعت "تركيا" من انضمامها للاتحاد الاوروبى  هى انها مازالت تعمل بنظام التجنيد الاجبارى وعدم اعترافها بالاعتراض الضميرى .. 




طب وبالنسبة للاعتراض الضميرى فى مصر .. ايه ظروفه ؟! ..


للاسف مصر ماوقعتش على المواثيق دى .. وبالتالى فهى بتقول للعالم انها معندهاش استعداد أصلاً انها تحترم المواثيق دى.

احنا شايفين ان لو مصر مالغتش التجنيد الاجبارى فاقل حقوقنا هى احترام هذه الوثيقة واعطاء الحق للشباب فى الاعتراض الضميرى اذا كان التجنيد يخالف حريته وفكره ومعتقده

وكفاية بقة اختراق للقوانين الحقوقية الدولية !! ..

أنا ضد التجنيد الاجبارى

كل ما ادردش مع حد عن رأيى فى التجنيد الاجبارى ورفضى ليه وانى بنادى بان التجنيد يكون اختيارى مش عارف ليه غالبا بلاقى اللى قدامى وشه حمر واتعصب وصوته على والكلمة الاساسية عند الكل "انت فكرك لو التجنيد اختيارى حد هيدخل!!" .. طب اهدا وفكر معايا كدة لو مفيش تجنيد اجبارى كان هيبقى ايه الكلام ؟!.


فى البداية ليه أنا ضد التجنيد الاجبارى ؟!

أنا ضد التجنيد الاجبارى لانه استمرار لنظام العبودية لان الدولة بتجبر الناس بدون وجه حق على اداء حاجة هما ماختاروهاش وبدون مقابل ..


أنا ضد التجنيد الاجبارى لانه استمرار لنظام السخرة وهو ان الجيش يضيع من عمرك 3 سنين من غير مقابل مادى يتنساب مع خطورة المهنة اللى انت فيها ..


أنا ضد التجنيد الاجبارى لاننا فى حالة سلام من أكتر من 35 سنة و مش محتاجين نجند كل الاعداد اللى بيتم تجنيدها حاليا لو أحنا فى حالة حرب يبقى التجنيد الإجبارى مبرر لكن ايه لزمتة فى وقت السلم؟ ليه الدولة بتصرف كل الفلوس دى على كل المجندين دول من غير أى لزمة؟ مش الأحسن توجيه الفلوس دى لصالح التنمية و اصلاح التعليم و محاربة البطالة؟


أنا ضد التجنيد الاجبارى لان الجيش عمره ما كان بالعدد و لكن بكفائة الجنود و خبرتهم و رغبتهم فى القتال و بتقدم الاسلحة و المعدات اللى معاهم .. احنا عايزين يكون عندنا جيش صغير من المحترفين متدرب كويس و معاه أحدث أسلحة ودة أحسن من لما يكون عندنا جيش كبير مسحوب من الاحتياط للجبهة على طول و بيحارب ببنادق خشب.


أنا ضد التجنيد الاجبارى لأن النظام الحالى للتجنيد نظام عنصرى بيفرق بين المواطنين على أساس الجنس و الدين و سن الأب و جنس الأخوة و الجنسية التانية و جنسية الوالدين .. احنا عايزين قانون واحد يتطبق على المواطنين كلهم دون أى تمييز ما بينهم.


أنا ضد التجنيد الاجبارى لأن التجنيد بيسحب الحقوق السياسية عن المجندين يعنى المجند بيفقد حقوقة فى الترشح أو الانتخاب طول فترة وجودة فى الجيش، كل دة و هو داخل الجيش غصب عنه، فإزاى الدولة تجبر واحد على الخدمة الوطنية و فى نفس الوقت تسحب منة حقة الانتخابى؟


أنا ضد التجنيد الاجبارى لأن اللى مأدوش خدمتهم العسكرية ممنوعين من ممارسة العمل السياسى و دة بيناقض الدستور اللى بينص صراحة على أن الدولة تكفل تكافؤ الفرص بين المواطنين فى الوصول لمقاعد السلطة.




طب ليه التجنيد الاجبارى استمرار لنظام العبودية ؟!

لو قريت فى التاريخ هتعرف ان التجنيد الإجبارى ظهر أول مرة فى العصر الحديث مع حركة تحرير العبيد .. ساعتها لما الاقطاعيين حرروا العبيد اشترطوا على العبيد انهم يخدموا جزء من عمرهم فى التجنيد الإجبارى و دة بيؤكد فكرة ان التجنيد الاجبارى هو استمرار لنظام العبودية




طب ايه هو النظام الاختيارى (اللى انت بتقول انه بديل) ؟!!

نظام التجنيد الاختيارى هو النظام اللى ابتكرته الدول المتقدمة اللى أدركت سلبيات نظام التجنيد الإجبارى دول زى الولايات المتحدة الأمريكية و بريطانيا و فرنسا و أسبانيا و البرتغال و دول عربية زى الأردن و المغرب و المملكة العربية السعودية و لبنان و العراق … و مش دول بس دة أكتر من 60 دولة حوالين العالم لغوا نظام التجنيد الإجبارى و طبقوا نظام التجنيد الاختيارى و باقى الدول فى السكة


فى نظام التجنيد الاختيارى بيتكون الجيش ( زى أى جيش فى العالم ) من قسمين …


1- الجيش الأساسى : خريجى الكليات العسكريةو دول بيبقى الجيش هو مهنتهم و بيفضلوا فية طول حياتهم لحد ما يطلعوا على المعاش


2- المتطوعين ( أو المجندين احتياريا ) : و دول الناس اللى حابين يخدموا فى الجيش بمزاجهم مقابل المزايا اللى بيقدمها الجيش ( بتبقى مدة خدمتهم فى الأغلب 5 سنين قابلة للتجديد )


و هنا ييجى سؤال مهم جدا : طيب هما ليه هيروحوا الجيش بمزاجهم ؟ … و هنا ييجى دور الدولة فى توفير مميزات للمتطوعين فى الجيش ، و فى توفير معاملة حسنة و مناخ ملائم جوا الجيش يشجع المواطنين على التطوع .. طب ايه هى المزايا دى ؟؟!!


- زى مثلا مرتبات عالية تتناسب مع صعوبة الخدمة العسكرية و مع المخاطر اللى بيواجهها


المجند فى الجيش


- زى مثلا أنة بيتعلم ببلاش فى أى جامعة بعد ما يخلص حدمته العسكرية ( لاحظوا أن التعليم فى معظم دول العالم بيكلف مصاريف غالية جدا و مش كل الناس بتقدر تدفعها )


- زى أن الدولة بتديله خصم على سعر البنزين اللى بيشتريه ( البنزين فى معظم الدول غير مدعم ، و بيكلف الناس جدا )


- و زى أن الدولة كلها بتقف جنب المجند دة و بتحترمه و بتقدره و فى أى موقف المجند بيلاقى كل المسئولين واقفين جنبة


- زى أن المجند بينام فى مكان نضيف و فى أوض ماتزيدش عن 3 أفراد و بياكل أكل نضيف و بيتعامل معاملة كويسة و تقريبا مش بيصرف حاجة جوا معسكرات الجيش يعنى فلوسه كلها متحوشاله لحد ما يخرج


- زى أنة عندة ضمان اجتماعي كويس عندة تأمين صحى و بيتعالج على نفقة الدولة لو أصيب أو أتوفى بيبقى فية تعويضات عادله


زى ما أنتم شايفين … مزايا أقتصادية و أجتماعية … المزايا دى قادرة على أقناع شباب كتير أنة يتطوع فى الجيش





طب أقولك علّى ماتعرفهوش !!

اللى ماتعرفهوش ان في حوالى 8 مليون مصرى دفعوا غرامة التهرب من التجنيد و دة معناه أن حوالى 30% من الذكور البالغين تهربوا من الخدمة العسكرية و دة رقم بيكشف أن الشعب المصرى مش مؤمن بأهمية التجنيد الإجبارى و أن الشعب شايف أنة طالما احنا فى وقت سلام يبقى الدولة مش محتاجالنا فى الجيش … و دة مش نقص وطنية ولا حاجة لأنة بعد هزيمة 67 كتير من المصريين اتطوعوا من نفسهم فى الجيش و كان المتطوعين نسبة كبيرة من القوات المحاربة فى 73.

أنــــا ضــــد التجنـيـــــد الإجبـــــــارى ..

ملعون "أبونا"

فى البداية أعذرونى فى الاسم .. بس الاسم نابع من كبت جوايا وجوا كتير غيرى بيعانوا من الكبت اللى بيحاول أهليهمم يكبتوهم بيه .. طبعاً انا عارف ان ده خوف من الاهالى مش اكتر بس انا كل اللى عايزه انهم يفهموا ان الزمان اتغير وان جيلنا يختلف تماماً عن اى جيل عاشوا فيه اهالينا.

مش قادرين يفهموا ان جيلنا محى كلمة اسمها خوف .. مش قادرين يفهموا ان جيلنا فى اللى وقف قدام الدبابات والمدرعات واللى وقف قدام المترو ! .. مش قادرين يفهموا ان جيلنا فيه ناس نزلوا مظاهرات بعين واحدة .. مش قادرين يفهموا ان احنا جيل محدش يقدر يوقفنا لو مهما حصل.

أنا واحد من اكتر الناس اللى بتعانى "فشخ" من الموضوع ده .. انا واحد من الناس اتخانق مع والدى ووالدتى بعد كل مظاهرة او مسيرة اطلع فيها .. بعد كل كلمة اكتبه ع الفيس .. بعد كل تويتاية بكتبها .. بعد كل لقطة اطلع فيها فى التلفزيون.

بجد ارحمونا.. وبعتذر مرة تانية ع الاسم بس ملعــــون أبـــــونا ..

قاصرون !!

"+18" ... علامة بشوفها كتير جداً فى حاجات كتير جداً وبتخنق منها كتير جداً جداً جداً .. افتح التليفزون ألاقى (هذا الفيلم +18) أجى أشترى علبة سجاير ألاقى ورقة كبيرة مكتوب عليها (+18) .. الانتخابات (+18) .. ده حتى الملاهى فى لعب مكتوب عليها (+18).

كونى قاصر وماكملتش 18 سنة ده فى حد ذاته كنز لا يعوض لأنى فى عيون العالم "طفل" وتطبق عليا قوانين حقوق الطفل اللى بتدينى امتيازات فى مجالات مختلفة زى الغذاء والتعليم والتأمين وغيره .. ولكن للاسف بنعيش فى بلد لا تحترم الانسان بصفة عامة عشان تحترم حقوق الطفل بالخصوص .. أنــا قــاصر بــس للاســف فــى مـــصـــر.

لماذا التطفل الدينى ؟!

اسمك ايه ؟!! السؤال ده غالباً بيتسألى أنا أو لغيرى لسبب واحد بس وهو التأكد من "الديانة" .. لو عايز تتأكد جرب قول لواحد سألك السؤال ده اسم يمشى مسيحى ومسلم هتلاقيه لأما بيسألك وش عن ديانتك لأما بيتخابس عليك .. يعنى مثلاً هتلاقيه شغال على طول صلى ع النبى ووحد الله وغيره وغيره.

سيبك من ده .. هتلاقى ناس كتير على الفيس-بوك وتويتر وغيره من مواقع التواصل اول حاجة تعملها لو ضفتها تفتح بروفايلك وتبص على ديانتك أول حاجة.
ده غير طبعاً خانة الديانة فى بطاقتك وفى شهادة ميلادك وغيره وغيره .. الخلاصة ان شعبنا شعب طائفى بالفطرة ومريض بالفوبيا الدينية "مرض اخترعه المصريين" .. وطبعاً الغباء الطائفى والدينى انعكس بشكل طافح على السياسة بأشكال كتير زى الاستفتاء وانتخابات البرلمان ومستقبلاً انتخابات الرئاسة ...


وأخيراً .. من خازوق لخازوق يا قلبى ما تحزن.

لا لعسكرة المدارس

لو بقول عسكرة المدارس فأنا باقصد بده فرض مواد خاصة بالخدمة العسكرية على المدارس .. ومادام اتكلمت عن فرض مواد عسكرية على المدارس زى التربية العسكرية فلازم اتكلم عن مدرسة "المنيا"  "الثانوية"  "بنين" ,, حد جاب سيرة عسكرية فى الاسم خالص ؟!!!
مع ان المدرسة اسمها المنيا الثانوية بنبن مش المنيا الثانوية العسكرية الا ان انت فى المدرسة مفروض عليك مادة اسمها التربية العسكرية .. انت لا هتاخد فيها حصص ولا تمارين ولا اى حاجة , بس هتمتحن فيها ولو سقطت هتملحقها ولو سقطت تانى هتتحجب عنك النتيجة ومش بعيد تعيد السنة عشان "العسكرية.

طبعاً فرض المادة دى على الطلاب جريمة .. لان اولا الطلاب باعتبارهم قاصرين (تحت الـ18عام) لا يجوز لهم اداء اى صورة من صور الخدمة العسكرية وده بناءً على قوانين ومواثيق دولية لحقوق الطفل .. ثاينا ان انا من وجهة نظرى ان دى اداة بيجهزوا بيها الطلبة لأداء التجنيد "اجبارياً) مستقبلاً وعشان محدش يفكر انه يرفض تجنيده.

أنا رفضت اداء المادة ولكن للاسف عبيد المدرسة امتحنوا .. لا لعسكرة المدارس.