الثلاثاء، 14 أغسطس، 2012

التحرش بالمدونات !!

فيه ناس كتير بتنتقدنى عن كلامى عن الدين .. عن كلامى عن التجنيد .. عم حاجات كتير .. بس غريبة اوى اوى اوى ان اكتر من واحد ينتقدنى فى مدوناتى اللى بانتقد فيها التحرش الجنسى !! .. انا فعلا لسة مش مستوعب ده.

لما دورت شوية لقيت ان مش اول مرة الحوار ده يحصل .. فمن فترة بعض المدونات اختاروا انهم يفضفضوا شوية ويتكلموا عن اللى بيشوفوه البنات فى الشارع بطرق مختلفة .. بلغة عربية عامية قبيحة فجة ساخرة !! ايا كانت الطريقة .. المفاجأة ! هجوم بطريقة غريبة عن المدونات اللى اتكلموا عن الموضوع ده .. غريبة فعلا !!

تمام .. المدونات ماسكتوش اكيد .. عملوا حملة جميلة جدا اسمها "كلنا ليلى" شاركت فيها المرأة بكل طوائفها .. محجبة او بشعرها .. مسلمة او ميسحية ,, مسيسة او لأ .. الكل كتب وطلع اللى جواه بكل جرأة .. وفهموا الناس بجد يعنى يبقى فيه "مرأة" فى مصر.

وطبعا ذروة الحملة دى لو تفتكروا لما المدونين كشفوا احداث التحرش الجنسى فى وسط البلد فى الاعياد .. واللى كان بيطلع يكدب ولا يهاجم كانوا بيحطوا صباعهم فى لامؤاخذة عينه الن كل حاجة كانت واضحة وبالفيديوهات.

طبعا لا ينسى للمدونين فى الوقت ده انهم مش مركزين على السلبيات بس فكانوا بيتكلموا برده عن اصحاب المحلات والشباب النضيفة اللى كانت بتدافع عن البنات فى الوقت اللى كان الاعلام مركز على السلبيات بس (ويقولك احنا اللى بنشوه صورة مصر)

على التوازى اهتم المدونين بنوع تانى من التحرش هو التحرش السياسى .. كانت البداية من التحرش بالمتظاهرات ايام الاستفتاء .. وبعدها كانت شهادة محمد الشرقاوى عن خطفه وتعذيبه فى قسم قصر النيل بعد يوم واحد من تعذيبه .. كان تقريبا الشرقاوى اول واحد بتكلم بشجاعة وبدون خوف عن التعذيب داخل الاقسام وطبعا ده فتح الباب قدام ناس كتير انها تتكلم زى عماد الكبير وغيره !

الخلاصة ... محدش يقدر ينكر دور المدونين فى مواجهة مشكلة التحرش الجنسى .. احنا طبعا لا حلينا ولا هنحل المشكلة بالكتابة بس .. لكن ع الاقل قضينا على اى محاولة لانكارها او هدمها !.

الجمعة، 10 أغسطس، 2012

ردا على مدونة شاب !..

كنت من فترة كتبت مدونتى (لكم دينكم ولي الاختيار) .. وكنت بعرض فيها رأيى عن حرية الفرد فى اختيار دينه بعد وصول سن النضج او الرشد .. وطبعا انتقدت كتير واتشتمت كتير بس فى (شاب) كتب مدونة موجهة ليا ردا على مدونتى وعلى اى حد عجبته الفكرة او المدونة "اللى وصفهم بالجهلة والحمقى"

فى البداية يا شاب من حقك انك تنتقدنى او تقومنى زى ما سميتها انت .. لكن مش من حقك "ومش هسكت على ده" انك تقول على اللى عجبته المدونة والفكرة واللى قاللى "برافو" و"واو الله ينور عليك كلامك مظبوط" انه جاهل او احمق .. لان ده تعدى على اداب المناقشة والحديث وكان من المفترض انى ماردش عليك بس معلش !!!..

اولا .. انا قولت تعبير "الاذان فى الودن واصطحاب الاطفال للجوامع" استعارة عن فرض الاباء على ابناءهم اداء الطقوس الدينية وزرع مبادئ الدين عند الطفل دون ترك الفرصة للنظر الى الاديان الاخرى .. وكان واضح انى ماقصدتش التدخل فى طقوس دين معين "الاسلام" .. والدليل انى قولت بالنص (ونفس الكلام مع المسيحيين باختلاف الطقوس الدينية) .. وممكن الرجوع للمدونة والتأكد .. وارجو انك ماتخترش الكلام اللى يكيفك وتسيب الباقى.

هترك نقطة حكم الاذان وما شابه لاصحابه لانى ماتكلمتش ولا هتكلم فيه .. لانى مش بتدهل فى مدوناتى او انتقد دين معين بطقوسه لان الدين مش اسلام بس يا شاب وممكن ترجع لمدونتى (أديان) وتعرف ايه مفهوم الدين !..

الكثير ومنهم (الشاب) انتقد انتقادى لفكرة انه يتكتب فى شهادة ميلادى مسلم او مسيحى او بوذى او اى ديانة بمجرد ميلادى وقبل ما اكون اى فكرة عن الاديان.

كما قال (الشاب) الطفل ليس حر ولا يعرف شئ عن الدين .. لكن الطفل المفروض انه يتركه والده الى ان يصل لسن الرشد وهنا يأخذ قراره فى اختيار الدين .. فى المدة دى بقة الوالدين ينصحوا اولادهم ويعرفوهم يعنى ايه دين ..لكن مايفرضوش عليه دين واحد .. لانك لما تتربى على حاجة 18  19 سنة اكيد مش هتفكر فى حاجة غيرها .

وأخيرا .. انا انتقدت حالة مجتمعية تحدث فى مصر فعلا ولكن مش فى مصر بس ! .. والاحساس بصفار البيض اللى اتكلمت عنه هو الاحساس الذى انتابنى بمجرد قراية اول سطر من مدونة (شاب) ويا زميلى .. خانك عدم فهم التعبير :)..

الخميس، 9 أغسطس، 2012

أديان !


كونى "أحمد" جعل نقاش الناس معايا فى الدين قاصر على الاسلام فقط وحاولت كتير اوضح للناس انى باتكلم عن الدين عامة مش الاسلام بس .. فقررت انى احكى معاكوا شوية عن الدين كمفهوم ..



* فى البداية .. يعنى ايه دين ؟!! ..
- الدين جاية من "دان"  .. يعنى خضع او ذل .. والتدين هو الخضوع والذل "للرب طبعا !" .. 
- علماء الاجتماع والانثربولوجى عرفوا الدين على اساس انه أفكار المجردة أو قيم أو تجارب جاية من الثقافة
- أساتذة العلوم الانسانية كانت ليهم وجهة نظر برده .. فمثلا جريج إبستين استاذ العلوم الإنسانية قال: "في الأساس كل الديانات الكبرى في العالم تأسست على مبدأ أن هناك قوة سماوية مع ذات مستوى من العدالة في عالم خارق ولا يمكن أن يأتي من الطبيعة"
- وغيره ..


* اذا فالمعتقد الدينى غالبا بيرتبط بالطبيعة والوجود .. بعبادة اله أو آلهة واشراك الإلهية في الكون والحياة البشرية .. وبيرتبط برده بالقيم والممارسات .. وفي بعض الديانات "زى السماوية او الابراهيمية" يقال أن معظم المعتقدات الأساسية كشفت من خلال اله.


* ولكل دين أسس وثوابت موجدة في كل دين .. زى الإسم - المؤسس - الكتاب - التقويم - اللغة - مكان العبادة - الطقوس - وقت الظهور.


* اكبر ديانات فى العالم هم المسيحية "2.2 مليار نسمة" .. الاسلام "1.6 مليار نسمة" .. والبوذية ثم الهندوسية ثم اليهودية


* بعض العلماء صنفوا الاديان لنوعين :-
  1. الأديان العالمية التي حققت قبول في جميع أنحاء العالم وذات تزايد كبير من المعتنقين الجدد لهذه الاديان.
  2. الديانات العرقية التي يتم تحديدها ضمن مجموعة عرقية معينة ولا يوجد إقبال على اعتناقها.


* كتير من العلماء وممارسى الدين والحقوقيين اكدوا على ضرورة التعاون بين الاديان او زى ما بيسموه حوار الاديان .. اول حوار اديان كان باسم (برلمان اديان العالم) فى المعرض الكولومبى العالمى سنة 1893 .. وكانت اخر المبادرات "كلمة سواء" و "الارض المشتركة" .. الاول بين الاسلام والمسيحية .. والتانى بين الاسلام والبوذية .



فافتكروا ان الدين اكبر بكتير من المفهوم اللى فى دماغك .. الدين مش بس اسلام او مسيحية .. 

الأربعاء، 8 أغسطس، 2012

الصراحة راحت !..

فى حاجات كتير ويمكن فى كل اللى كتبته قبل كدة كان دايما رد الفعل بيكون بالتكفير والتخوين والشتيمة وساعات التهديد .. وكان اللى بيشكر فيا كان بيقولى انت جرئ !!


طبعا دى شهادة اعتز بيها جدا واكيد الجرأة شرف وثمة صعب انك تلاقيها فى اى حد .. لكن اللى نفسى اوصله لناس كتير ان انا صريح مش جرئ !! .. انا اللى بتكلم فيه سواء رأيى فى دين أو فى التجنيد أو فى المرأة أو أيا كان اللى بحكى فيه هى موضوعات واراء من المفترض ان ليا ولأى حد الحق انه يتكلم فيها وبكل حرية .. 


لكن للاسف تقاليدنا وعادتنا وثقافتنا اللى للاسف زرعتهولنا اجيال قديمة عشان احنا اللى نلم محاصيله الفاسدة حولت الصراحة الى جرأة .. والعادات دى برده اللى خلت الواحد يخاف يفكر فى الدين .. خلت الولد بيبص للبنت بصورة مش موجودة غير عندنا .. خلت الجنرالات تستعبد الشباب لان ثقافتهم منعتهم من التفكير !!..


انا اللى نفسه اوصله ان انا وانت من حقنا نتكلم وبكل صراحة مش جرأة .. لان مفيش حاجة تخوفنا ولا ترعبنا من الكلام عشان نواجهها .. مفيش مخاطر بتقابلنا عشان نتغلب عليها .. مفيش حواجز فى طريقنا .. الموضوع اسهل من كدة بكتير .. الموضوع مش اكتر من فكرة بتدافع عنها .. 


فكر .. قرر .. اتكلم .. واجه .. اصدم .. ناقش .. وماتخفش من ردة فعل اى حد .. بجد ده حقك .. اه وربنا حقك 



أنا صريح :)..

الأربعاء، 1 أغسطس، 2012

تحيا جمهورية مصر الطائفية !..

"دفن الرؤوس فى الرمال" .. منهج فشيخ تتبعه مصر وبطريقة "جزمة" فى مواجهة حوادث الفتنة الطائفية .. بداية من الخنكة ومرورا بمئات الحوادث المشهورة والغير مشهورة وصولا ل قميص دهشور !!!..


واحدة واحدة .. من الطبيعى ان بناء الكنايس يكون من ملفات الدولة .. او من مهام الاحزاب مثلا ! .. لكن مع بداية الشد وبداية احداث الفتن وخصوصا الخانكة مش فاهم ليه اتحولت قضايا بناء الكنايس ومناقشة مشكلة الطائفية مطالب مرفوعة من الكنيسة !! وبناءً عليه تحولت مصر الى حزبين كبار .. حزب مسيحى برئاسة البطريرك ... وحزب مسلم برئاسة "رئيس الجمهورية"!.. فتتوالى الاحداث من خانكة للزاوية الحمرا للكشح لنجع حمادى لابو قرقاص وشوية حاجات كتير كدة فى النص لغاية ما نوصل للقميص !!.


طبعا ً عيب نتكلم كل ده وننسى الدور التاريخى للرئيس الراحل الله يجحمه مطرح ما راح "محمد أنور السادات" .. فكان التكفير من الجماعات الاسلامية للمسيحيين فى هصره برعاية رسمية .. وطبعا كان ليه الدور الاول والاساسى فى كنيسة الخانكة !! وبعدها الزاويا الحمرا !! لغاية ما يسافر بسلامته عشان يمضى معاهدة كامب ديفيد وفى موقف محدش يقدر ينساه للبابا شنودة .. يُعزل البابا !!.. ومن وقتها وزادت الفتنة فتوصل لاستحلال اموال المسيحيين ويبدأ السطو على محلات الذهب وعلى البيوت احيانا وتبدأ توصل لقتلى وجرحى كتير زى اللى حصل فى الكشح ! .. 


ومن ساعتها و احنا بنستغرب لما تعدى عليناا فترة من غير حادث فتنة !! .. وطبعا كل مرة بندفن روسنا فى الرمل بدل ما ندور ونحاول نوصل لحلول او حتى لاسباب الحوادث دى ..


وطبعا طبيعى جدا بعد اللى بيحصل ده ان احنا نلاقى قميص بيتسبب فى موت ناس واصابة ناس وتهجير ناس !!!..




فتحيا جمهورية مصر الطائفية !.