الجمعة، 7 سبتمبر، 2012

مجتمع شرقى

الحاجة الوالدة وجيلها بالكامل بالاضافة الى البعض من الاجيال الحديثة دايما بسمع منهم كلمة شليلة اوى فعلا "يعنى تشل" .. الا وهى (احنا مجتمع شرقى مش غربى وثقافتنا مش بتسمحلنا بكذة .. ولازم نحافظ على ثقافتنا) !!.

طب اقولك !.. طل طلة كدة على ثقافة المجتمع الشرقى اللى احنا متمسكين بيها اوى دى وماينفعش نستغنى عنها .. هتلاقيها صفار بيض .. فبعد تفحيص وتمحيص وتفعيص اكتشفت لقيت ان الثقافة اللى بنتكلم فيها دى بتنحصر فى كام حاجة فقيعة غير واقعية ولا منطقية .. لكن طبعا ماينفعش نخالفها !!..

فمثلا ً ..
مجتمع شرقى يعنى الولد مسموحله كل حاجة والبنت ممنوع تعمل اى حاجة .. مجتمع شرقى يعنى الهوت شورت فى الساحل عادى لكن برا الساحل قلة ادب !! .. مجتمع شرقى يعنى البنت لو خلصت جامعة وماتجوزتش بعد حفلة التخرج يبقى وش مش هتتجوز !! .. مجتمع شرقى يعنى البنت اللى بتشتم تبقى سافلة انما الولد يشتم ده طبيعى .. مجتمع شرقى يعنى الحشيش عيب انما الخمرة حرام !! .. مجتمع شرقى يعنى ماتضحكيش بصوت عالى فى الشارع لان دى مياعة وقلة ادب !! .. مجتمع شرقى يعنى لو بنت واقفة مع ولد فى الشارع فمتوقع طبعا انها تروح معاه شقة مفروشة !! .. مجتمع شرقى يعنى الولد يحب براحته لكن ساعة الجواز لازم ماما تختارله واحدة متربية وبنت اصول تختارها هى .. مجتمع شرقى يعنى بنت بتشرب سجاير وشيشة يبقى اكيد اهلها ماربوهاش ومايعرفوش عنها حاجة ! .. مجتمع شرقى يعنى اتطلقتى ؟!! اكيد العيب منك ومحدش هيرضى يتجوزك تانى ! .. مجتمع شرقى يعنى لو عملت حاجة غلط فالعيب مش عليك العيب ع الهانم اللى ماربتش !! .. مجتمع شرقى يعنى الولد يحب واحدة ويتجوز واحدة غيرها خااالص !! .. مجتمع شرقى يعنى يخافوا ع البنت من الدنيا ومايخافوش على الولد من الاخرة .. مجتمع شرقى يعنى البنت عيب تجرى او تركب عجلة .. مجتمع شرقى يعنى البنت فى الجواز ليها صلاحبة "ثلاثون عاما" .. مجتمع شرقى يعنى كل الامراض النفسى والعصبية !!

الخلاصة .. مفيش حاجة اسمها شرقى ولا غربى ولا فشخنجى .. انت بثقافتك مش بثقافة جدك ! ..  انت باللى مقتنع بيه مش باللى الناس مقتنعة بيه .. انت انت !

هناك تعليق واحد: